ഡിജിറ്റല്‍ സ്‌ക്രീനുകള്‍ കുട്ടികളെ ബാധിക്കുന്നതെങ്ങനെ ?

'ആദിക്ക് ഫോണ്‍ കിട്ടിയാല്‍ പിന്നെ വഴക്കൊന്നുമില്ല, മിണ്ടാതെ ഒരറ്റത്തിരുന്നോളും'. കുട്ടിക്ക് ഇഷ്ടപ്പെട്ട കളിപ്പാട്ടം കൊടുത്ത ലാഘവത്തോടെയാണ് നാല് വയസുകാരനെക്കുറിച്ച് അമ്മ കൂട്ടുകാരിയോട് പറഞ്ഞത്. ശരിയാണ്, ബാര്‍ബി ഡോളും, ജെസിബിയും ആവശ്യപ്പെട്ടിരുന്ന കുട്ടികള്‍ക്ക് ഇപ്പോള്‍ സ്മാര്‍ട് ഫോണും ടാബും കിട്ടിയാല്‍ മതി.

കുട്ടികളുടെ കരച്ചില്‍ നിര്‍ത്താനും അവരുടെ കുസൃതി കുറയ്ക്കാനും സ്മാര്‍ട്‌ഫോണും മറ്റും നല്‍കുന്ന മാതാപിതാക്കള്‍, ഡിജിറ്റല്‍ സ്‌ക്രീനുകള്‍ കുട്ടികളില്‍ ഉണ്ടാക്കുന്ന പ്രശ്‌നങ്ങളെക്കുറിച്ചും അറിഞ്ഞിരിക്കേണ്ടതുണ്ട്.

ബൗദ്ധിക വളര്‍ച്ചയെ ബാധിക്കും

ഡിജിറ്റല്‍ സ്‌ക്രീനുകളുടെ അമിത ഉപയോഗം കുട്ടികളുടെ ബൗദ്ധികമായ വളര്‍ച്ചയെ സാരമായി തന്നെ ബാധിക്കും. കുട്ടികളുടെ മസ്തിഷ്‌കം വികാസം പ്രാപിക്കുന്നത് ആറ് വയസ് വരെയാണ്. അതുകൊണ്ട് ചെറിയ പ്രായത്തില്‍ കുട്ടികള്‍ ഡിജിറ്റല്‍ സ്‌ക്രീനുകള്‍ ഉപയോഗിക്കുന്നത് അവരുടെ ആക്ടിവിറ്റികള്‍ക്ക് തടസമാകും.

ഈ പ്രായത്തില്‍ മസ്തിഷ്‌ക വികാസം കൂടുതലായി നടക്കേണ്ടതുണ്ട്. ഡിജിറ്റല്‍ സ്‌ക്രീനുകളുടെ ഉപയോഗം മസ്തിഷ്‌ക വികാസം മന്ദഗതിയിലാക്കും. നാല് വയസ് വരെ കുട്ടികളില്‍ മസ്തിഷ്‌ക വികാസം വളരെ വേഗം നടക്കേണ്ടതുണ്ട്.

ഡിജിറ്റല്‍ സ്‌ക്രീനുകളുടെ ഉപയോഗം കൂടുന്നതുകൊണ്ട് മസ്തിഷ്‌കത്തിലെ പല ഭാഗങ്ങളുടെയും വികാസത്തിന് തടസമാകും. ഇതുമൂലം പ്രായത്തിനനുസരിച്ചുള്ള മസ്തിഷ്‌ക വികാസം ഉണ്ടാകില്ല. അതുകൊണ്ട് നാല് വയസ് വരെ ഡിജിറ്റല്‍ സ്‌ക്രീനുകളുടെ ഉപയോഗം പരമാവധി ഒഴിവാക്കണം.

കഥകള്‍ കേള്‍ക്കാത്ത ബാല്യം

മുമ്പൊക്കെ വീടുകളില്‍ കുട്ടികള്‍ക്ക് കൂട്ടായി പ്രായമായവര്‍ ഉണ്ടായിരുന്നു. അവര്‍ കുട്ടികളുടെ കാര്യങ്ങളിലെല്ലാം പ്രത്യേകം ശ്രദ്ധ നല്‍കിയിരുന്നു. കുട്ടികള്‍ക്ക് കഥകള്‍ പറഞ്ഞുകൊടുക്കുന്നതിന് സമയം കണ്ടെത്തിയിരുന്നു. ഈ കഥകളിലൂടെ കുട്ടികള്‍ ഒട്ടേറെ കാര്യങ്ങള്‍ മനസിലാക്കാനാകും.

കുട്ടികളുടെ സര്‍ഗാത്മകമായ കഴിവുകള്‍ വികസിക്കും. സംസാരരീതിയും ആംഗ്യങ്ങളും പഠിക്കാന്‍ സഹായിക്കും. അന്നൊക്കെ കുട്ടികള്‍ക്ക് ഒറ്റയ്ക്കിരിക്കേണ്ട അവസ്ഥ ഉണ്ടായിട്ടില്ല. എന്നാല്‍ ഇപ്പോഴുള്ള തലമുറ കഥകള്‍ കേട്ടല്ല വളരുന്നത്.

സംസാരിച്ച് തുടങ്ങേണ്ട പ്രായത്തില്‍ പോലും കുട്ടികളുമായി ആശയവിനിമയം നടത്താന്‍ വീടുകളില്‍ ആരുമില്ല. തിരക്കുകള്‍ക്കിടയില്‍ പരസ്പരം ആശയവിനിമയത്തിന് സമയം ലഭിക്കാറില്ല. ആശയവിനിമയത്തിന്റെ 97 ശതമാനവും നോണ്‍ വെര്‍ബല്‍ കമ്യൂണിക്കേഷനാണ്.

ഏഴ് ശതമാനം മാത്രമാണ് വെര്‍ബല്‍ കമ്യൂണിക്കേഷനില്‍ ഉള്‍പ്പെടുന്നത്. അതുകൊണ്ട് ആശയവിനിമയക്കുറവ ് കുട്ടിയുടെ മുന്നോട്ടുള്ള ജീവിതത്തെ സാരമായി തന്നെ ബാധിക്കും. മുതിര്‍ന്നവരുടെ സംസാരത്തിലൂടെയാണ് കുട്ടികള്‍ സംസാരരീതികള്‍ മനസിലാക്കുന്നത്.

ടാബുകളുടെയും സ്മാര്‍ട്‌ഫോണുകളുടെയും ഉപയോഗം വ്യാപകമായതോടെ കുട്ടികള്‍ കൂടുതല്‍ സമയവും ശ്രദ്ധിക്കുന്നതും ഇവയാണ്. നാല് വയസ് വരെ കുട്ടികള്‍ മുതിര്‍ന്നവരുമായി ഇടപഴകുന്നത് കഴിവതും പ്രോത്സാഹിപ്പിക്കണം. മുതിര്‍ന്നവരുടെ സംസാരത്തില്‍ നിന്നാണ് കുട്ടികള്‍ പുതിയ വാക്കുകള്‍ മനസിലാക്കുന്നത്.

കാര്‍ട്ടൂണുകളും മറ്റ് പ്രോഗ്രാമുകളും ആശയവിനിമയത്തിന് ഒരു പരിധി വരെ സഹായിക്കുന്നുണ്ട്. കാര്‍ട്ടൂണുകളിലെ കഥാപാത്രങ്ങള്‍ വെര്‍ബല്‍, നോണ്‍വെര്‍ബല്‍ കമ്യൂണിക്കേഷനു സഹായിക്കുന്നുണ്ട്. എങ്കിലും കാര്‍ട്ടൂണുകള്‍ക്ക് അഡിക്ഷനാകാതെ കുട്ടികളെ ശ്രദ്ധിക്കേണ്ടതുണ്ട്.

കായിക വിനോദങ്ങളില്ല

പണ്ടുകാലങ്ങളില്‍ കുട്ടികള്‍ക്ക് വീടിന്റെ പരിസര പ്രദേശങ്ങളില്‍ ധാരാളം കൂട്ടുകാര്‍ ഉണ്ടായിരുന്നു. ഇന്ന് കുട്ടികള്‍ക്ക് ടാബും സ്മാര്‍ട് ഫോണുമാണ് സുഹൃത്തുക്കള്‍. ഡിജിറ്റല്‍ സ്‌ക്രീനുകളുടെ ഉപയോഗം കൂടിയതോടെ സമപ്രായക്കാരുമായുള്ള ബന്ധങ്ങള്‍ കുറഞ്ഞു.

ഒഴിവ് സമയങ്ങളില്‍ ശാരീരിക വ്യായാമത്തിന് പോലും കുട്ടികള്‍ക്ക് നേരമില്ല. ഇത് കുട്ടികളുടെ ആരോഗ്യത്തിന് ദോഷം ചെയ്യുന്നുണ്ട്.

രാവിലെയും വൈകുന്നേരവും കൃത്യമായി വ്യായാമം ചെയ്തിരുന്ന കുട്ടികള്‍ ഒരുനേരം പോലും വ്യായാമത്തിനായി കണ്ടെത്തുന്നില്ല. വൈകുന്നേരങ്ങളില്‍ കളിക്കാന്‍ പോകാന്‍ കുട്ടികള്‍ താല്‍പര്യം പ്രകടിപ്പിക്കാറില്ല. മാതാപിതാക്കളും ഒരുപരിധി വരെ ഇവയൊക്കെ അനുകൂലിക്കുന്നുണ്ട്.

കുട്ടികള്‍ വീടിനു വെളിയില്‍ പോയി കളിക്കാന്‍ മാതാപിതാക്കള്‍ നിര്‍ബന്ധിക്കാറില്ല. മാതാപിതാക്കളെ സംബന്ധിച്ച് കുട്ടികള്‍ വീട്ടിലിരിക്കുന്നതാണ് സൗകര്യം. പരിക്കുകള്‍ സംഭവിക്കുമെന്ന ഭയവും ഉണ്ടാകുന്നില്ല. ഇവയൊക്കെ കുട്ടികള്‍ക്ക് ഡിജിറ്റല്‍ സ്‌ക്രീനുകളുടെ ഉപയോഗം വര്‍ധിക്കാന്‍ കാരണമാകുന്നുണ്ട്.

പഠനത്തില്‍ പിന്നോട്ട്

സ്മാര്‍ട്‌ഫോണിന്റെയും ടാബിന്റെയും അമിത ഉപയോഗം കുട്ടികളുടെ പഠനനിലവാരത്തെ ദോഷമായി തന്നെ ബാധിക്കുന്നുണ്ട്. പല കുട്ടികളും പഠനത്തിന് മുന്‍പ് സ്മാര്‍ട്‌ഫോണില്‍ ഗെയിമുകളും മറ്റും കളിക്കുന്നത് പഠനത്തിന് തടസമാകും. പഠിക്കുന്നതിനു മുന്‍പ് ടാബ്, ഫോണ്‍ എന്നിവ കുട്ടികള്‍ ഉപയോഗിക്കുന്നത് പരമാവധി ഒഴിവാക്കണം.

ടിവി കാണുന്നതും പരിമിതപ്പെടുത്തണം. ദീര്‍ഘനേരം സ്‌ക്രീനില്‍ നോക്കുന്നതു മൂലം ഇവര്‍ക്ക് പെട്ടെന്ന് ക്ഷീണം അനുഭവപ്പെടും. കണ്ണുകളിലെ മസിലുകള്‍ക്ക് സമ്മര്‍ദം ഉണ്ടാകാനും ഇടയുണ്ട്. ഇവയൊക്കെ പഠനത്തില്‍ ശ്രദ്ധകേന്ദ്രീകരിക്കുന്നതിനു തടസമാകും. കൂടാതെ പഠനസമയം കുറയുകയും ചെയ്യും.

പഠനത്തിനായി ലഭിക്കുന്ന സമയം നല്ല രീതിയില്‍ ഉപയോഗപ്പെടുത്താന്‍ കുട്ടികള്‍ക്ക് സാധിക്കാതെ വരും. ഉറക്കക്കുറവും ക്ഷീണവും കുട്ടികളുടെ ആരോഗ്യത്തിനും ദോഷം ചെയ്യും.

രാത്രിയില്‍ ഏറെ നേരം ഫോണും ടാബും ഉപയോഗിക്കുന്നത് കുട്ടികളുടെ ഉറക്കത്തിന് തടസം സൃഷ്ടിക്കും. രാവിലെ ഉന്മേഷത്തോടെ ഉറക്കമുണരാനോ, ഒരു ദിവസത്തെ മുഴുവന്‍ കാര്യങ്ങളും ഉത്സാഹത്തോടെ ചെയ്തു തീര്‍ക്കാനോ കഴിയാതെ വരും.

മാതാപിതാക്കള്‍ അറിയാന്‍

1. കുട്ടികള്‍ ഡിജിറ്റല്‍ സ്‌ക്രീനുകള്‍ ഉപയോഗിക്കുന്നതില്‍ നിയന്ത്രണം വരുത്തണം. നിശ്ചിത സമയം അതിനായി മാതാപിതാക്കള്‍ തീരുമാനിക്കുക.
2. പഠനത്തിന് മുന്‍പ് കുട്ടികള്‍ക്ക് ഫോണും ടാബും നല്‍കുന്നത് ഒഴിവാക്കുക. പഠനത്തിന് ശേഷം മാത്രം ടി.വി, ഫോണ്‍, ടാബ് ഇവ അനുവദിക്കുക.

3. കുട്ടികളുടെ പഠനത്തെയും ആരോഗ്യത്തെയും ഉറക്കത്തെയും ബാധിക്കുന്ന തരത്തിലുള്ള ഉപയോഗം തീര്‍ച്ചയായും നിയന്ത്രിക്കണം.
4. രാവിലെയോ, വൈകുന്നേരമോ കുട്ടികളെ വ്യായാമം ശീലിപ്പിക്കുക. മറ്റ് കായിക വിനോദങ്ങള്‍ക്ക് കുട്ടികളെ പ്രോത്സാഹിപ്പിക്കുക.

5. കുടുംബാംഗങ്ങളുമായി മാനസിക അടുപ്പം നിലനിര്‍ത്താന്‍ പഠിപ്പിക്കുക. ഒറ്റയ്ക്കിരിക്കാന്‍ പഠിപ്പിക്കുന്നത് ഒഴിവാക്കുക. എല്ലാവരുമായി നല്ല ആത്മബന്ധം വളര്‍ത്തിയെടുക്കാന്‍ പ്രേരിപ്പിക്കുക.
6. യാഥാര്‍ഥ്യങ്ങളുടെ ലോകത്തേക്ക് കുട്ടികളെ കൈപിടിച്ച് കൊണ്ടുവരാന്‍ മാതാപിതാക്കള്‍ശ്രദ്ധിക്കണം.

അനില്‍ കുമാര്‍
സീനിയര്‍ കണ്‍സള്‍ട്ടന്റ് സൈക്കോളജിസ്റ്റ്
ഡിപ്പാര്‍ട്ട്‌മെന്റ് ഓഫ് ക്ലിനിക്കല്‍ സൈക്കോളജി
ഇന്‍സ്റ്റിറ്റ്യൂട്ട് ഫോര്‍ കോഗ്നിറ്റീവ് ആന്‍ഡ്
കമ്മ്യൂണിക്കേറ്റീവ് ന്യൂറോസയന്‍സസ്, തിരുവനന്തപുരം

തയാറാക്കിയത്:
നീതു സാറാ ഫിലിപ്പ്